Díi Mundial del Mediu Ambiente: res que cellebrar

  • 6 Xuño, 2018

El Díi Mundial del Mediu Ambiente cellebróse ayeri ensin pena nin gloria n’Asturies: una esposición de semeyes, la edición d’un llibru, una marcha en bici con protesta programada pa la fin de selmana y la mar, con perdón, enllena mierda nel sen más lliteral

Esti 5 de Xunu tampoco nun había ná digno de cellebrar n’Asturies, el Paraisu Natural nel qu’agonicen los 54 caberos gallos monteses, onde se pasó del 70%  al 43% de superficie arbolao nun par de décades y se permite la invasión d’especies alóctones dañibles con porgüeyos económicos entantu se talen indiscriminadamente les autóctones, onde les quemes brutales entamen a ser tradicionales, los escapes tósicos son  tan avezaos que ya nun son noticia -tenemos la peor calidá d’aire del estáu ya’l mayor nivel de muertes por sides ambientales-  y los espacios naturales son reclamu turísticu enantes qu’abellugu natural.

Los criterios económicos primen n’Asturies perriba’l mediu ambiente y perriba la salú mesma de los asturianos, permitiéndose a les industries emisiones tósiques tantu al aire comu a los acuíferos, consitiendo obres y esplotaciones que deterioren irreversiblemente l’hábitat d’especies protexies -daqué que tamién perxudica a los ganaeros, que se ven invadíos por estos animales en busca d’espaciu- , anteponiendo un turismu mal entendíu a la xestión ambiental de los Parques naturales… La falta de dotación de medios materiales y d’encontu llegal a la guardería de montes fae imposible controlar l’enveleñamientu indiscrimináu ya’l furtivismu; la permisión de metodos de pesca y estración d’ocle qu’arrasen colos caladeros confabúlase colos arramaos tósicos que lleguen a la mar pa dir escosando les costes; la deficiente planificación de los recursos hídricos, con arramaos, canalizaciones innecesaries y un emportante déficit de depuradores pal tratamientu d’agües residuales y la desproteición a especies ca vegada más escases nos ríos, como los salmones o les anguiles, lleva al desaniciu de los hábites fluviales y de vega…

Una enumberación llarga y doliosa d’ataques desmidíos ya en munchos casos incomprensibles, de los que namás puede deducise un total dispreciu de les alministraciones, española y del “Principado”, faza lo que ye Asturies como territoriu, equiparable namás al dispreciu qu’amuesen faza lo que ye Asturies comu país.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies