“El filu que nun ruempe ye’l que fai texíu”; con eses pallabres se proclamaba Andecha Astur heriedera d’aquellos que, va 210 años, declararon al pueblu asturianu dueñu’l so futuru
Comu cada añu nos caberos ventiún, Andecha Astur fexo coincidir el Díi d’Andecha cola alcordanza de la hestórica Declaración de Soberanía de 1808. Los actos entamaron cola rialización d’un actu d’Homenaxe a les puertes de la Sala Capitular onde tevo llugar la Declaración, ufriendo un ramu de flores n’honor a la Xunta Suprema.
Darréu fizo una intervención Llucía Fernández, quien reivindicó a los presentes nel actu como continuadores de la defensa de la Soberanía asturiana, viva a lo llargo los sieglos, destacando la emportancia de caltener vivu l’espíritu que llevó a los asturianos a estos fechos hestóricos “El filu que nun ruempe ye’l que fai texíu” afirmó, animando a continuar nel llabor de “superar l’Estatutu impuestu y la propia Costitución española, en defensa del drechu del Pueblu Asturianu a decidir llibremente’l so futuru”
Recalcó tamién la emportancia del calter popular de la Xunta Suprema y de la declaración, xurada por tolos sos miembros, na qu’esplicitamente se reconoz la soberanía popular asturiana, no que costitúi’l primer actu d’autodetermín d’Asturies na dómina contemporánia. Na so intervención acusó tamién a les Istituciones del “Principado” y a los partios políticos asturian0s con representación na Xunta Xeneral de tapecer estos fechos,”ñegándose siquiera a retrucar a la propuesta que tolos años fai Andecha Astur nel sen de que se reconoza oficialmente’l 25 Mayu”
La cellebración del XXI Díi d’Andecha remató con una Espicha popular nos llocales de la organización n’Uviéu, cola participación de militantes y simpatizantes.
Nuria Prendes
This work is licensed under a Creative Commons Attribution 4.0 International License.
