La Federación Asturiana Memoria y República (FAMYR), la Amical de Mauthausen y l’Atenéu Obreru de Xixón entamen una campaña de reconocencia a les víctimes asturianes nos campos de concentración nacional-socialistes
Anque nun esiste un Censu de víctimes y represaliaos asturianos nos campos de concentración alemanes, necesariu para conocer y espublizar la magnitú de la represión exercida sobro’l pueblu asturianu y faer posible el reconocimientu oficial de les víctimes, tiense constancia de que 185 asturianos, incluyendo 4 muyeres, tuvieron internaos en campos de concentración nazis; d’ellos sábese que 95 morrieron nos campos, 58 fueron lliberaos, 1 safóse y de los 30 restantes nun se tienen datos.
Nel 73 aniversariu de la lliberación de los campos nazis, delles asociaciones asturianes que protexen la memoria hestórica reclamen un homenaxe a toos aquellos que carecieron la barbarie del facismu alemán, nel que s’esprese la reconocencia y homenaxe institucional a les víctimes que careciero l’horror de los campos de concentración y sobremanera, a los asturianos y asturianes, faciendo esta reconocencia y homenaxe estensible a los sos familiares.
Proponen tamién l’allugamientu d’un monolitu o escultura en memoria y reconocencia a los homes y muyeres deportaos a los campos de concentración nazis ente 1940-1945.
Amás consideren pertinente la presencia istitucional del Gobiernu Asturianu nos actos internacionales de conmemoración, que se cellebren nel campu de Mauthausen con ocasión del aniversariu de la so lliberación, asitiando una placa que dexe costancia de la nuesa reconocencia.
Llucía F. Marqués
This work is licensed under a Creative Commons Attribution 4.0 International License.
