Más d’un centenar de persones participen nesta prueba non competitiva que va percorrer la hestórica N-630 y la A-66
El llunes 30 de abril, van afayase en Xixón el centenar de motocicletes de cilindrada mayor a 250 c.c. que participen nel I Rally Turísticu Ruta Vía de la Plata qu’arranca mañana, vienres 27 d’abril en Sevilla.
Demientres cuatro díes motociclistes llegaos de tolos requexos d’España van compartir la esperiencia de percorrer ún de los caminos más vieyos de la Península Ibérica nun viaxe auténticu nel tiempu que pasa pela hestórica N-630 (y A-66) dende la capital andaluza hasta Xixón.
Nel so pasu per Asturies (llunes 30 d’abril), los motociclistes van travesar y visitar dellos conceyos na Ruta Vía de la Plata hasta llegar a Xixón. Na Plaza’l Marqués s’allugará la meta d’esta prueba non competitiva. Ellí van afitase carpes con información sobro’l Rally y la Ruta Vía de la Plata.
L’envís principal d’esta prueba de calter turísticu nun ye atopar al motociclista que seya quien a travesar más rápido la Ruta Vía de la Plata, sinon esfrutar unos díes de rodada en moto per una de les rutes más guapes del nuesu país, arrodiaos de xente coles mesmes ganes y pasión poles dos ruedes.
De Sevilla a Xixón
La prueba avanza a lo llargo de cuasi mil kilómetros y cuatro comunidaes autónomes, creando un itinerariu perinteresante per España y Asturies, con delles ciudaes Padremoñu de la Humanidá, puertos míticos de montaña, una montonera de manifestaciones artístiques y monumentales de primer nivel, y una naturaleza cambiante que va dende los campos d’Andalucía hasta les elevaciones de la Cordelera Cantábrica, travesando les deheses y les viesques d’encines y monte baxo estremeños, y pasando pelos horizontes pictóricos de la meseta castellana.
En paralelo, van realizase incursiones a puntos d’interés y tramos que, pese a abandonar temporalmente la N-630, van aguapecer les xornaes de conduición dando-yos un estra d’aventura a la yá ablucante Ruta Vía de la Plata. Na prueba nun van faltar sorpreses y visites a llugares estratéxicamente asitiaos pa esfrutar del que promete ser un rally diferente.
ETAPES
- Vienres, 27 d’abril: Sevilla
Verificaciones: Oficina de Turismu de Sevilla de 15:00 h a 19:30 h.
Briefing xeneral: 20:00 h. nel edificiu Turismu de Sevilla.
- Sábadu, 28 d’abril: Sevilla – Mérida
Salida: Puerta l’Hotel Silken Al -Andalus Palace de 8:00 h a 9:00 h.
Final d’etapa en Mérida: de 17:00 a 19:30 h. na Plaza de España (Mérida).
- Domingu, 29 d’abril: Mérida – Zamora
Salida: Parking del Hotel Ilunion Mérida Las Lomas de 8:00 h a 9:00 h.
Final d’etapa: de 17:00 a 19:30 h. na Plaza Mayor (Zamora).
- Llunes, 30 d’abril: Zamora –Xixón
Salida: Parking del Hotel AC Zamora de 8:00 a 9:00 h.
Final de Rally: de 17:00 a 19:30 h. na Plaza’l Marqués (Xixón).
21:00 h. cena de dispedida nel restorán Bellavista.
Entamáu por Travelbike, axencia de viaxes en motocicleta con nueve años de trayeutoria y númberu 1 en viaxes en moto n’España, el I Rally Turísticu Ruta Vía de la Plata tien el sofitu de la Red de Cooperación de Ciudades en la Ruta de la Plata.
Rede de Cooperación de Ciudades en la Ruta de la Plata
La Rede de Cooperación de Ciudades en la Ruta de la Plata ye una asociación voluntaria y ensin ánimu de llucru constituyida por ciudaes allugaes na nomada Ruta Vía de la Plata y na so zona d’influencia. El so envís ye remanecer los recursos turísticos de les poblaciones que la integren y dar valor a la montonera d’atractivos d’esti itinerariu.
Anguaño, la rede ta formada por 27 conceyos: Xixón, Llanera, La Ribera, Morcín, Riosa, Mieres, Ayer, Ḷḷena, La Pola Gordón, Llión, La Bañeza, Benavente, Zamora, Guijuelo, Béjar, Baños de Montemayor, Hervás, Plasencia, Casar de Cáceres, Mérida, Los Santos de Maimona, Zafra, Calzadilla de los Barros, Fuente de Cantos, Montemolín, Carmona y Sevilla.
This work is licensed under a Creative Commons Attribution 4.0 International License.
