Multitudinaries concentraciones per tol país en refuga a les recientes sentencies xudiciales españoles

Xixón, Uviéu, SMRA, Cangas de Narcea, Ribeseya, la Pola Llaviana, Cangues d’Onís, Avilés, Mieres, Tinéu… xente de toles llocalidaes asturianes amosaron la so indignación nes sos places en multitudinaries concentraciones convocaes sobre la marcha polos mesmos ciudadanos al conocese la noticia de la sentencia que nun considera violación a la penetración forzada de cincu homes, un d’ellos guardia civil ya otru militar, a una moza de 18 años con premeditación, robu, grabación y posterior reconocimientu de los fechos -con orgullu y per escritu- por parte de los acusaos.

   “Pelease con un guardia civil en chigre supón una denuncia de terrorismu y 60 años de cárcele, canciar ye delitu d’alendar el terrorismu, que un guardia civil atropelle y mate un paisano dándose a la fuga son lesiones y que te violen guardies civiles y militares ye namás abusu. Esa ye la xusticia güei n’España”.

Con eses pallabres  resumíase na Plaza’l Parchís la situación.

La especial proteición a determinaos coleutivos, como ye’l casu de les fuercies de seguridá del estáu, xúnese nesti casu a la especial desproteición de la muyer y  sienta xurisprudencia, dexando abierta la puerte a milenta agresiones más.

Ayeri, al  pocu de sabése la sentencia que prauticamente lliberaba a los violadores, n’Avilés otru xuiciu por violación resolvíase como “abusu non agresión sesual: aunque hubo actu sesual non consentíu y exercíu con superioridá, nun se produxo la violencia necesaria pa consideralo violación”.

Llucía F. Marqués

This work is licensed under a Creative Commons Attribution 4.0 International License.