Col envís de recuperar l’habitat natural del osu pardu nel conceyu Degaña, convócase un llantáu de frutales autóctonos nos tarrenes amburaos de los sos montes
Les quemes de los caberos años nun foron solo una llaceria pa la nuesa flora, sinon que la fauna de les Viesques vióse fuertemente afeutada pola desapaición de los sos llugares de residencia. Osos y llobos perdieron los sos hábitats, baxando del monte en munchos casos y averándose a les poblaciones, creando una importante alarma social de la que ye frutu l’actual espirica sobro los sistemes de control d’esta triba de mamíferos y la so convivencia col ser humanu.
El conceyu de Degaña foi una de les fasteres oseres más afeutaes poles quemes qu’asolaron el país l’ochobre pasáu. Dende la Fundación Osu Pardu en collaboración con Victor Quei Vitorino y Grupo El Gaitero convoquen una xornada de llantáu d’árboles, col envís de repoblar parte de les Viesques del conceyu, permitiendo la recuperación d’un hábitat afayaizu pa los nuesos osos.
El llantáu fadránlu voluntarios y tendrá llugar el prósimu 6 de mayu. Los autobuses saldrán de Xixón, Uviéu y Cangas de Narcea a lo llargo de la mañana, con destín a la llocalidá de Trabao, que sedrá onde se faiga’l llabor de llantáu d’árboles autóctonos. Les ferramientes, llantones y desplazamientos apúrrelos la Fundación Osu Pardu, pero ye preciso apuntase previamente nel teléfonu qu’apaez nel cartelu.
Nuria Prendes
This work is licensed under a Creative Commons Attribution 4.0 International License.
