La conseyera de Desendolcu Rural y Recursos Naturales del “Principado”, María Jesús Álvarez, acaba de mentar la posibilidá d’un retayu d’hasta’l 30% nes aides  cola prósima reforma de la Política Agrícola Común que va aplicase de magar 2020

En pocu más d’un mes conoceráse’l marcu financieru tresañal de la Xunión Europea y nesta ocasión el presupuestu tendrá d’ellaborase con un estáu menos, el Reinu Xuníu, qu’apurría importantes fondos, lo que fai tarrecer un fuerte retayu nes aides a l’agricultura, que podría aportar a ser fasta d’un 30%.
La producción d’alimentos sanos y seguros, llograos al traviés d’una agricultura respetuosa col mediu ambiente y coles condiciones llaborales de los trabayadores que los cultiven, dientro d’una economía que permita caltener vives y poblaes les zones rurales europees nun sedría posible ensin les aides de la PAC, yá que producir alimentos n’Europa resulta más caro que n’otros llugares del mundu.
Les aides de la PAC -de les que Asturies ye beneficiaria- traten de retribuir al productor por esta desventaxa competitiva pa la nuesa agricultura, anteponiendo los beneficios sociales de caltener viva la fastera rural a la rentabilidá económica.
Güei costituyóse un grupu de trabayu integráu por representantes de los seutores implicaos, organizaciones y cooperatives agraries y ganaderes, la Rede Asturiana de Desendolcu Rural, la conseyería de Desendolcu Rural y Recursos Naturales del “Principado” y los grupos parlamentarios, cola fin d’aldericar la rempuesta que va dase dende Asturies a esti amenorgamientu nel casu de llegar a materializase.

Llucía F. Marqués

This work is licensed under a Creative Commons Attribution 4.0 International License.