Sieru preslla la XIV Selmana de Comerciu Xustu con un mercáu y alderiques alrodiu’l cambeu climáticu y la so relación col Comerciu Xustu

Los productores del Comerciu Xustu nun defenden namás les condiciones dignes de los y les trabayaores que producen les sos materies primes, sinón que contribuin a controlar el cambeu climáticu colos sos proyeutos.  Planes de recuperación de suelos, xeneración de compost orgánicu de magar los residuos xeneraos pol procesáu de la caña de sucre, proyeutos de fomentu de la biodiversidá o el desendolcu de midies pal usu eficiente ya igualitario del agua, son dalgunes de les llabores asociaes a esti movimientu que tuvo’l so escaparate la selmana pasada nel conceyu de Sieru.

Esti domingu, ensin que los bastiazos d’agua lo torgaren, punxeron el puntu final a esta XIVª Selmana de comerciu xustu, iniciativa del Conseyu Llocal de Solidaridá, con un mercáu que foi al tiempu puntu d’alcuentru y alderique nel que les propuestes de meyora surdieron pente l’artesanía’l país, les verdures de cultivu respetuosu, los xuegos tradicionales y participativos, los llibros con tilde na xusticia social y munches otres ufiertes que se presenten como alternatives al consumu masivu de productos dañibles pal planeta.

Redaición InfoAsturies

This work is licensed under a Creative Commons Attribution 4.0 International License.