Los xardinos del Hospital Central Universitariu d’Asturies (HUCA) foron nuevamente fumigaos con una yerbicía conocíu pola so peligrosidá pa la salú humana

Ye cierto que les yerbicíes a bas de glifosato son más económicos qu’otros tipos menos agresivos pa la salú humana, pero a xuiciu de la CEA, que denunció los fechos, eso nun puede ser argumentu pa utilizar productos tósicos poniendo en situación de riesgu a la población, y menos entá na redolada del mayor centru sanitariu d’ Asturies.

Según la Coordinadora Ecoloxista d’Asturies, esisten estudios científicos que rellacionen l’usu de la yerbicida glifosato con diverses enfermedaes, yá que actúa como un disruptor hormonal, prevocando efeutos dañibles como tosicidá subaguda y crónica, daños xenéticos, trestornos reproductivos, aumentu de la frecuencia d’anomalíes espermátiques y carcinogénesis.

Amás, cada preparáu yerbicía que contien glifosatu vien acompañáu d’otres sustances que faciliten la so absorción y que multipliquen la so tosicidá. Ente estos ingredientes tán el N-nitroso glifosatu que, como otros compuestos nitroxenaos, son canceríxenos ya’l formaldehidu, otru carcinóxenu conocíu que se forma mientres la descomposición del glifosato.

Los efeutos dañibles d’esta yerbicía afeuten tantu al mediu ambiente como a les persones de la redolada, especialmente los trabayadores que lu empleguen y los que permanezan nos alrodios de los llugares nos que s’utiliza, siendo tamién un importante contaminante de les agües soterrañes por filtración del mesmu.

Llegalmente pal so usu ye necesario avisar primeramente a los llendantes del riesgu anantes d’entamar a utilizalo por que puedan caltenese lloñe de los sos efeutos.

El so usu pela redolada d’un centru sanitariu, d’onde los pacientes nun pueden colar y son especialmente sensibles a cualesquier axente nocivu paez por tantu especialmente desaconseyáu.

Nuria Prendes

This work is licensed under a Creative Commons Attribution 4.0 International License.