Dende la Plataforma d’Afectaos pola Hipoteca y los Desfiucios d’Asturies soliciten el sofitu a tolos asturianos pa presionar a Liberbank y consiguir un alcuerdu aceutable
Nazario y Loli son una pareya de xubilaos a los que Liberbank -entidá que recibió cuantioses aides publiques al traviés de la fusión de delles caxes d’aforros- va dexa-yos ensin casa.
Nazario, parquetista yá xubiláu, y Loli, ama de casa, son unos de los munchos pas que respondieron polos sos fíos pa la compra d’una vivienda. Siempres de pallabra dícen-yos qu’en cuantu se pague una cantidá determinada de la hipoteca, ellos quedaríen lliberaos de la mesma.
Cuando españa la crisis y los tipos d’interés xuben, vense imposibilitaos para faer frente a les cuotes del citáu préstamu. Amás el so fíu, David, pierde’l trabayu na empresa de costrucción na que taba.
David, Nazario y Loli aporten a la Plataforma d’Afectaos pola Hipoteca y Desahucios d’Asturies a esponer la so situación. Dende la PAHD ponense’n contautu con Liberbank para llegar a un alcuerdu, a lo que Liberbank s’opón dafechu. Nun se consigue dengún acercamientu con ellos, amosándose amás intransixentes y negándose a nengún tipu de negociación.
Liberbank entama entós el procedimientu xudicial para quedase cola vivienda de David y tamién cola de los sos pas (Nazario y Loli). Una vivienda que pagaren diba dellos años colos sos trabayos, que taba llibre de cargues y asitiada n’unu de los barrios más obreros de Xixón.
Ye nesti procedimientu cuando Nazario y Loli s’enteren de que non yá’l so fíu va perder la casa, sinón qu’amás ellos tamién.
Agora, tres l’acampada protagonizada como mediu de presión pola PAH nes oficines de Liberbank y dempués de que les xestiones del bancu fundieren sicolóxicamente a esta familia,la entidá ufiérta-yos un alcuerdu que resulta inaceutable, pa nun perder la vivienda Nazario y Loli tienen qu’asumir una delda de 93.600 euros a la que nun pueden faer frente, ya que la cuota tendría un importe de más de la metá de los sos ingresos, una pensión de 900 euros.
Nazario y Loli aceutaríen, y asina-y lo fixeron saber a Liberbank, parte d’esa delda pa caltener la so vivienda, pero con una cuota razonable que pudieren pagar acordies los sos ingresos. El vienres die 16 de Marzu fixo entrega a Liberbank d’un documentu coles cantidaes que Nazario y Loli podríen asumir, teniendo como plazu dica esti vienres pa da-yos una rempuesta.
Dende la PAH piden a la población asturiana que s’espublice esti mensaxe, que los que seyan clientes del bancu entren y cuenten el casu, que falen col direutor o direutora p’afalalos a sentase colos afeutaos y algamar un alcuerdu, “Si nun s’aporta a alcuerdu hai xente que ta diciendo al bancu que van retirar la nómina, cuentes…”
Tamién conviden a siguilos en face o twiter pa informase de les aiciones que se vaigan entapando pa desixir a Liberbank qu’axuste un alcuerdu razonable pa qu’esta pareya de xubilaos, puedan siguir viviendo nel que lleva munchos años siendo’l so llar.
Llucía F. Marqués
This work is licensed under a Creative Commons Attribution 4.0 International License.
