Mañana va presentase en Xixón el serviciu d’arriendu de sielles especialmente afeches pa que les persones con movilidá amenorgada puedan pasiar pela sablera
Les sielles Ontrack, con tración de guxanu que permite’l desplazamientu pel campu, la nieve o’l monte, costitúin una importante meyora nel ociu inclusivu y nel nivel de vida de les persones con problemes de movilidá nes zones rurales.
Estes sielles aportaron al continente gracies a una anéudota na Escalerona: Juan Carracedo, responsable de OnTrack, reparó como una pareya de vieyos teníen de dixebrase (ella moyando los pies na mar, él na so siella mirando dende’l muriu) pa pasiar pela playa. Yera l’añu 2.014.
Espertu en lloxística ya inxeniería, el fundaor de Technolis Outsourcing entamó a maxinar una siella de ruedes inclusiva, pero nel procesu de creación del prototipu atopóse con que n’Estaos Xuníos yá esistía y optó pola importación d’estes sielles. El so costu ronda los 13.000 euros, en función de les característiques del modelu, una y bones dalgunos d’ellos dexen camudar de postura, pasiar argutu y otres facilidaes pa poder desenvolver estremaes actividaes.
Agora, gracies a un conveniu col Conceyu Xixón, va ser posible arrendar estes sielles pa esfrutar de les sableres de la ciudá.
La so presentación va tener llugar mañana a les 12:30 nel hotel ABBA y de siguío va realizase una demostración práutica na sablera San Llorienzu.
Llucía F. Marqués
This work is licensed under a Creative Commons Attribution 4.0 International License.
