Esta convocatoria nun anula el tradicional manifestamientu del Díi Les Lletres que se cellebrará, como tolos años, el primer vienres de mayu, coincidiendo colos actos oficiales de l’ALLA

Dada la tensa situación que se ta viviendo nel ámbetu llingüísticu asturianu, cola Oficialidá más cerca que nunca per un lláu, los continuos y perfuertes ataques a la llingua  pel otru, el decidíu sofitu del pueblu asturianu, y la indeterminación de la mayoría de los grupos políticos completando’l panorama, la Xunta Pola Defensa la Llingua adelántrase al mes de les lletres y convoca un manifestamientu pola Oficialidá el sábadu 21 d’abril, a les 12:00 la mañana.

Anantes de la fecha marcada la XPLA cuenta aconceyar con estremaes entidaes -partíos, sindicatos y asociaciones- y personalidaes col envís d’atropar sofitos. Amás, dende agora y dica’l 21 d’abril la XPLA anuncia bien d’actividaes coles que dirán caleciendo l’ambiente y que la participación nella seya masiva. Ente otres iniciatives ta previsto dar a los estremaos grupos municipales de dellos conceyos la posibilidá de posicionase a traviés d’una moción-tipu de sofitu a esta movilización pa que la lleven a Plenu nes selmanes que queden hasta’l 21 d’abril de manera qu’aquellos que dicen defender los derechos llingüísticos de los asturianos y asturianes se posicionen de manera inequívoco a favor de la Oficialidá darréu yá ensin ambigüedaes. Tamién tienen planeaes delles aiciones publicitaries, como la creación vídiu-clip, cuñes de radio y anuncios nos autobuses urbanos d’Uviéu, Xixón y Avilés.

Nuria Prendes

This work is licensed under a Creative Commons Attribution 4.0 International License.