Mañana nun escribo: Fuelga de muyeres

  • 7 Marzu, 2018

L’añu pasáu, tal díe como güei, escribía un artículu entituláu talamente lo mesmo qu’esti. Tuví tentá de copiar y pegar, repetir artículu, quien quiera lleelu verá que sigue tando 100% actualizáu

Hai más cartelos, si, fálase más, muncho más del tema. De ser tabú pasó, pasu perimportante, a ser políticamente correuto. Quedó nidio, a lo llargo d’esti añu, que l’acosu a les muyeres trespasa toa llende xeográfica, económica y política. Na entrada la mio ciudá hai un cartelu que diz “Xixón diz NON a les violencies machistes”, como midía disuasoria, albidro.

Sicasí, nesti caberu mes, tres muyeres “desapaecieron” n’Asturies; d’una sabemos que ta muerta. Les muyeres pasámonos notines en silenciu pel wasap “nun vaigas sola col coche” “ten curiáu”. Tenemos miéu.

Tamién n’Asturies, va pocu, un grupu d’abogaos cristianos denunció tres clíniques por ufiertar, pente los sos servicios y de forma perfechamente llegal, el de prauticar la interrupción voluntaria del embarazu.

Les pensionistes asturianes cobren la metá que los pensionistes… y eso nel casu de les que cobren daqué. Les mayestres cobren un 14% menos que los mayestros.

Unes 1.900 asturianes al añu dexen los sos emplegos pa curiar de persones dependientes. 87.000 muyeres declaren alcontrase’n paru por “atender del llar”, frente a 6.100 homes na mesma situación.

Seique nun se pueden aportar cifres concretes por cuestiones evidentes, toos sabemos que la prautica totalidá de los trabayos en prieto de más baxa remuneración -llimpieza, curiáu de reciella y de vieyos- recae en muyeres.

La probitú nel mundiu tien nome de muyer: el 70% de les persones n’estrema probitú son de sesu femenín.

Nueve de cada diez muyeres carecieron dalguna triba d’acosu o abusu sesual a lo llargo la so vida. Yo nun conozo a esa una.

De manera menos visible, n’Asturies les muyeres carecemos una doble xornada esgotadora, la llaboral, na que ye davezu esplotada, malpagada y menospreciada nel so llabor, que s’amiesta a la familiar, na qu’atiende a fíos y persones dependientes, además de les llabores de la casa, poques vegaes compartíes. Les consecuencies a nivel personal tan nidies, esgotamientu, falta tiempu pa sigo mesma, abandonu d’intereses y proyeutos presonales… pero a nivel social esta doble xornada tamién tien consecuencies tarreceores: falta de participación social, escasez de presencia política, ausencia de representación, menor puxu profesional y poro masculinización de tolos ámbetos.

Estos son dalgunos de los argumentos polos que mañana nun escribo. Podría siguir. Igual ye tiempu de camentar en daqué más que’n poner cartelos y facer declaraciones d’intenciones.

Llucía F. Marqués

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies