L’abandonu del tresporte públicu asturianu prevoca situaciones esperpéntiques, como la cancelación de cuasi cien trenes en tres díis “por falta de repuestos”

Sumándose a los ya avezaos retrasos y paraes por avería, esta semana vamos camín de record en supresión  de viaxes de cercaníes: 30 cancelaos de llunes, 38 de martes, 22 de miércoles… toos ellos  ensin previu avisu nin espublización de les cancelaciones a traviés de la páxina web de FEVE nin nel so Twitter.

L’escasu caltenimientu de los trenes, la falta de pieces de repuestu ya inclusu de personal lleven a los pasaxeros a una situación de incertidume continuo que los emburria a otros medios de tresporte.

El problema de la falta de material vien a amiestase al de la falta de personal. Per un lláu la empresa afala a los conductores más veteranos a abandonar el so puestu ufriéndoyos bones condiciones y pel otru nun cubre eses baxes nin cumple los alcuerdos algamaos pa contratar a los conductores que pasaren per un periodu de práutiques cola promesa d’un contratu posterior -once maquinistes tan nesa situación n’Asturies-

Nesti intre tan a piques de quedar llibres los puestos de cerca de venti maquinistes y doce mecánicos, colo que los dos departamentos, que ya precisaben con urxencia más personal, van quedar en cuadru.

Pel so lláu, el gobiernu d’España -caberu responsable del caltenimientu d’esti serviciu- continúa ensin dar rempuesta a la entruga llevada al senáu por Andecha Astur va un añu na que se denunciaba esta situación d’abandonu de lo que foi un serviciu públicu exemplar, apuntando a “una intención privatizadora de los percorríos rentables y el desdexamientu del restu, cola consiguiente desconesión territorial del nuesu país”, postura que se ve sofitada pol fechu de que los trayeutos que más cancelaciones carecieron foron los de la llinia Xixón-Uviéu-Trubia, una de les más rentables.

Nuria Prendes

This work is licensed under a Creative Commons Attribution 4.0 International License.