Ta acusáu de delitos de prevaricación urbanística y contra la ordenación del territoriu na tramitación de les obres llevaes a cabu ente Llananzales y el Puertu de Piedrafita

La Coordinadora Ecoloxista d’Asturies yá denunciara nel 2.016 l’ampliación d’un sienda piatonal (PR) fasta convertila nuna pista de 9 Km, que va dende la llocalidá de LLananzales fasta’l Puertu de Piedrafita, una zona d’altu valor natural propuesta pa la so inclusión nos Llugares de Interes Comuñal. El Ministeriu Públicu atopó nicios razonables de delitu na actuación del alcalde, David Moreno, y del entós conceyal de Ganadería del consistoriu ayerán, lo mesmo que de tolos  funcionarios autonómicos que puedan ser responsables de los fechos a partir de los resultaos de la instrucción que realice’l xulgáu d’Ayeri

L’anchorde la pista supera anguañu los  7 metros, siendo preciso pa esta ampliación valtar indiscriminadamente arboláu de gran valir natural.  Según recueye la denuncia interpuesta polos ecoloxistes, pa la realización d’estes obres, qu’afeuten a tarrenes clasificaos como Non Urbanizables, nes categoríes d’Especial Protección, Especial Caltenimientu y d’Interés Agropecuariu, nun esistió proyectu téunicu d’obres, autorización ambiental, autorización previa de la CUOTA nin llicencia urbanística municipal, documentos toos imprescindibles antes d’acometer unes obres d’estes carauterístiques.

El Serviciu de Montes de la Conseyería de Desendolcu Rural y Recursos Autóctonos y la Confederación Hidrográfica procedieron yá l’añu pasáu a l’apertura d’espedientes sancionadores.

La esistencia d’una factura, otorgada pol  Interventor del conceyu d’Ayer, previa aprobación de l’Alcaldía que recueye’l pagu a una entidá ensin especificar d’un importe de 5.082,00 Euros, en conceutu de “díes d’obreru palista” referente a Obrar “pista Llananzanes-Piedrafita” demuestra la participación municipal na obra.

Esti nun ye l’únicu pleitu que pesa sobre David Moreno, que foi xulgáu la selmana pasada por otra causa -na que s’enfrenta a diez años d’inhabilitación- por prevaricación, pola presunta concesión irregular d’ayudes públiques a l’Asociación pa la Enseñanza y Promoción del Esporte.

Llucía F. Marqués

This work is licensed under a Creative Commons Attribution 4.0 International License.