Nel homenaxe al autor destacóse la so vertiente humana y política, el so decidíu compromisu col país y la incomprensión que les sos idegues carecieron y siguin careciendo
Tres de la emocionante llectura de los sos poemes delantre mesmo del llugar onde ta enterráu procedióse a la ofrenda floral ente la placa que Andecha Astur colocare’n so honor nel añu 2004 y a delles intervenciones nes que se destacó’l so compromisu políticu ya’l so llabor en defensa d’una Asturies llibre –como recueyen los sos escritos-.
Marcos A. Fernández, collaciu de so, fizo una reflexión sol calter alantráu a la so época d’Andres Solar, “Foi una persona fondamente incomprendía. Les sos idegues diben mui per delantre y chocaben a tol mundiu, quería facer les coses estremaes, anovar lo vieyo nunos casos, recuperar lo antiguo pa camudar coses nueves n’otros… siempres a mediu camín pente’l campu y la ciodá, pente lo d’anantes ya’l futuru, siempres con enfotu no que facía.”
Pel so lláu Paulo Arboleya, en nome d’Andecha Astur, recalcó’l cotraste pente la claridá d’idegues del escritor y la falta de compromisu d’algunes cellebridaes d’anguañu que “tres d’una vida declarándose nacionaliegos, pero negándose a implicase con dengún partíu asturianu “por nun perder siguiores” finaron por apuntase a partíos nidiamente españoles, contradiciendo tola so anterior trayeutoria.”
Llucía F. Marqués
This work is licensed under a Creative Commons Attribution 4.0 International License.
