Cuasi una cuarta parte de la población ocupada n’Asturies gana menos del SMI

Demientres gobiernu y “axentes sociales” se feliciten por poner enriba la mesa una subida “hestórica” del 4 % del Salariu Mínimu -qu’ entá nun ta aprobada sinón cenciellamente plantegada- n’Asturies 110.230 trabayaores cobraron el caberu añu perbaxo l’actual SMI pautáu.

Pa esi exerciciu la llende de la probitu afayábase nos 684 € pa una persona, malpenes venti euros perbaxo del actual SMI -706- col que se supón que tienen que vivir les families. Sicasí, N’Asturies algamar esti misérrimu mínimu nun ta a la man de toos, nin siquier trabayando.

Los datos son los más nuevos apurríos pola Axencia Tributaria y correspuenden al caberu exerciciu, ello ye, al 2.016. Acordies les sos cifres, d’ente les presones que declaren facienda, más de 110.000 nun pasen del que se supón el mínimu percibible, lo qu’implica alrodiu d’un diez por cientu de la población asturiana trabayando en condiciones de precariedá.

Contratos a tiempu parcial –que munches vegaes son de trabayu a tiempu completu-, temporalidá, trabayos fixos discontinuos… los caminos pelos qu’un trabayaor puede alcontrase cobrando perbaxo de lo que se supón el mínimu son abondos y si bien ye perimportante l’incrementu del SMI comu cifra de referencia, el so valir queda amenorgáu pola realidá de que’l salariu mínimu ye una cosa y lo menos que se paga, otra bien desemeyada.

Llucía F. Marqués

This work is licensed under a Creative Commons Attribution 4.0 International License.