El nuesu país ta estráu de fueses onde descansen los nuesos héroes de la llucha contra’l facismu español. Munchos, entá anónimos y perdíos. Dalgunos, como los cinco de Sobrepiedra, vivos na memoria de la so xente
La Federación Asturiana Memoria y República (Famyr) entamó ayeri un homenaxe a “los Cinco de Sobrepiedra”, que fueron fusilaos y soterraos nuna fuesa de la localidá parraguesa del mesmu nome.
El 12 d’avientu de 1937 Pelayo Norniella García, César Meré Sánchez, José Luis Cofiñu Sánchez, José Castañu Pandiella y Arturo Fontela Fernández fueron fusilaos, en siendo encarcelaos y torturaos na cárcel falanxista de La Tellería, en Les Arriondes. Fueron soterraos nuna fuesa común.
Va cuatro años La Federación Asturiana Memoria y República (Famyr) alzó un monolitu na so memoria y dende entós la federación, xunto con familiares y averaos a les víctimes, aconcéyase ellí cada añu por estes feches pa rindir homenaxe “a los que dieron la so vida pola llibertá y la democracia”. Les víctimes, les sos families y los sos compañeros esixen al estáu español: “verdá, xusticia y arreglu, ensin atayos”.
Redaición InfoAsturies
This work is licensed under a Creative Commons Attribution 4.0 International License.
