Col doble de muertes que de nacencies, Asturies rexistra la peor cifra dende 1.999, amosando que la población asturiana escai a un ritmu entá pior que los peores pronósticos

La tasa de mortalidá más alta del estáu y la de natalidá más baxa de toa Europa –menos d’un fíu por muyer – trai de resultes que Asturies seya la zona de la UE con menor proporción d’habitantes menores de 30 años. La continua sangría provocada pola emigración agrava’l problema.

Nel aumentu de la tasa de mortalidá intervienen numberosos factores, encabezaospol avieyamientu de la población. La ineficiencia del sistema sanitariu, xunía a la cayía de les condiciones de vida de les prersones mayores derivada de la esistencia de pensiones bien baxes (que conviven con otres llamativamente altes, dando llugar a una media engañosamente positiva) y al altu porcentaxe de paraos que subsisten al cargu de les pensiones de los sos mayores, son  otros importantes factores nel xorrecimientu del númberu de decesos.

Per otra parte, la situación sociu económica asturiana, con un perfil de formación alto y un nivel d’ingresos baxu, el difícil accesu a la vivienda y una inestabilidá llaboral que imposibilita los planes al llargu plazu, debuxa un escenariu que nun anima a les families asturianes a tener fíos.

Les consecuencies tantu a nivel económicu como cultural y social son catastrófiques, ye lo que dende Andecha Ástur califiquen como “Crónica d’un xenocidiu anunciáu”, faciendo con ello referencia a la lliteral desapaición paulatina de tou un pueblu, l’asturianu.

Redaición InfoAsturies

This work is licensed under a Creative Commons Attribution 4.0 International License.