El fútbol n’asturianu gana’l Pegollu demientres Cherines recibe’l Madreñazu

La Xunta pola Defensa la Llingua Asturiana vien de facer públicos los premios Andrés Solar 2.017, colos que reconoz la llabor normalizaora de los premiaos col Pegoyu y remarca l’asturfobia de los que reciben el galardón Madreñazu.

Na so trentaitresava edición el Pegollu foi esportivu , col reconocimientu del llabor de cuatro clús de fútbol asturianos y n’asturianu, que’l so valir trasciende lo meramente fubolístico: los equipos U.C. Ceares, Rosal F.C., C.F.F. Llosalín y C.D.E. Stiaua d’Asturies, que vienen desendolcando abondos proyeutos esportivos populares y cooperativos y que visibilicen l’asturianu nes sos equipaciones y nos estremaos materiales que xenera la so actividá.

El Madreñazu foi pal discursu del odiu y xenófobu de Mercedes Fernández González, más conocía como  “Cherines”, presidenta del PP n’Asturies. quien mereció xustamente’l Madreñazu que recibirá como premiu a les sos ridícules declaraciones contra la recuperación de la llingua asturiana, col aplausu de los seutores más retrógrados y españolistes de la sociedá asturiana.

Ye d’esperar que Cherines nun s’avere a la entrega de premios, el prósimu sábado 16 d’avientu a les 18:30 hores nel Salón d’Actos del Antiguu Institutu de Xixón. Darréu l’actu va haber un pinchéu abiertu pa los que quieran cellebrar colos clús de fútbol premiaos.

Redaición InfoAsturies

This work is licensed under a Creative Commons Attribution 4.0 International License.