Una dellegación d’Andecha Ástur pidirá en Bruseles la intervención de la OLAF na cuestión del marafundiu de los Fondos Mineros y buscará víes pa la intervención europea na tema de la contaminación ambiental

A lo llargo de los prósimos díes tres representantes de la organización política, integrada na coalición Los Pueblos Deciden, van aconceyase con comisionaos del parlamentu européu y espertos nes materies a tratar. Mientres esos alcuentros, de los qu’esperen salir con propuestes concretes d’actuación, van  informar sobro la situación actual n’Asturies.

Un de les principales temes a tratar va ser la contaminación ambiental, problema del qu’esta mesma selmana tuvimos dos bones amueses, coles medríes de 54 µg/m3  de Pm2,5 en Sieru (sobro los 25 permitíos pola OMS) y l’increyible picu de 417 µg/m3  de PM10 rexistráu ayeri en Xixón. Pa tratar esti tema, el miércoles van caltener una xunta con Roel Hoenders, Oficial de polítiques de la Comisión Europea encargada del control de la calidá del aire y emisiones industriales) y col Oficial de proyeutu científicu/téunicu Michael Klinkeberg. Ana Fernández, una de les representantes d’A.A, destacó qu’a cada picu de contaminación correspuende direutamente otru d’ingresos hospitalarios por urxencies respiratories y que los casos de cáncer de polmón y otres enfermedaes venceyaes a la calidá del aires multiplicáronse nos caberos tiempos, “Mentantu los nuesos gobernantes nun faen sinón entonar el canciu de la lluvia y sentase a esperar”.

Otra cuestión importante de la que se va falar estos díes nel parlamentu européu va ser el de los Fondos Mineros. Nesi sen Andecha Ástur cuenta con solicitar que la OLAF (Oficina Europea de llucha escontra’l Fraude) intervenga nel casu pa reclamar responsabilidaes a tolos culpables nel marafundiu nel usu de los fondos apurríos pola Xunión Europea pa la reactivación económica de les cuenques mineres.

Llucía F. Marqués

This work is licensed under a Creative Commons Attribution 4.0 International License.