El ríu Barayo y la ría d’Avilés fueron los dos puntos prietos nos que se deteutaron arramaos mientres la pasada fin de selmana

Les continues agresiones al mediu ambiente que carecemos n’Asturies concretáronse esta fin de selmana en nueves nubes d’emisiones contaminantes, otres cuatro quemes y más arramaos nos ríos.

Per un lláu, el Colectivu Ecoloxista d’Avilés denunció un nuevu arramáu producíu na ría d’Avilés, que tuvo como consecuencia más bultable l’apaición de dellos pexes muertos nes veres del paséu de l’Avenida Conde Guadalhorce. Esti nuevu arramáu, súmase a la llista interminable d’episodios contaminantes –d’orixe probablemente industrial- qu’acaben na Ría d’Avilés, mientres les autoridaes conformense con declarar que “nun son capaces d’identificar a los responsables”

Per otru llau, la Coordinadora Ecoloxista d’Asturies denunció énte la Confederación Hidrográfica del Cantábricu y énte  la Conseyería de Fomentu, Ordenación del Territoriu y Mediu Ambiente del “Principado” d’Asturies los arramaos  de fueses séptiques y purinos producíos el domingu na llocalidá de Borones (Valdes), na cuenca’l ríu Barayo onde se deteutó un vertíu d’agües fecales qu’aportó dica la desaguada del ríu, na Reserva Natural Parcial.

El retrasu na obligación de disponer de redes de saneamientu de les  agües residuales lleva en munchos casos a los vecinos a valerar les sos fueses séptiques n’agües comunes, polo xeneral de fin de selmana, poniendo en peligru la calidá de les agües que s’usen pal suministru y pa regar cultivos, colos riesgos inherentes a esta contaminación.

Llucía F. Marqués

This work is licensed under a Creative Commons Attribution 4.0 International License.