Lo qu’ocurra a esti serviciu afeutará a cortu, mediu o llargu plazu a la gran mayoría de la ciudadanía xixonesa, polo qu’afalen a acompangales na so desixencia de cumplimientu de los alcuerdos pautaos nel 2.016
Un añu depués de la firma nel plenu de la Casa Conceyu de Xixón del acuerdu de remunicipalización del serviciu d’Aida a Domiciliu, siguen esperando a que se cumpla.
La Plataforma d’Ausiliares de S.A.D d’Asturies Convoca güei a les siete la tardi una concentración cola que “celebrar” l’aniversariu de lo que creíen yera un pasu alantre na so llucha, pero que por agora nun ye más que papel moyao y promeses nel aire. Na mesma cuntaráse cola música de la charanga “El Ventolín”.
Esta ye una cuestión que tresciende’l conflictu llaboral en si mesmu, ya que tola ciudadanía se ve o se verá afeutada polo qu’ocurra con esti serviciu. Asina lo faen ver na so convocatoria, destacando la importancia qu’esti serviciu tien dientro d’una población avieyada, como ye la xixonesa y l’asturiana en xeneral, na que’l númberu de les presones que dependen d’un gabitu pal so díi ente díi ye ca vegada mayor “Garantizar un serviciu d’aida a domiciliu públicu y de calidá ye la meyor inversión que podemos facer por nos mesmos, dalgunos como familiares de los sos usuarios y toos como potenciales usuarios del mesmu”.
Redaición InfoAsturies
This work is licensed under a Creative Commons Attribution 4.0 International License.
