Símbolos d’estrema drecha fueron grabaos nes muries del espaciu social La Manzorga

L’Espaciu Cultural y social La Manzorga vien de carecer un ataque fascista. La so fachada apaeció grabada con numberoses esvástiques ya’l so escaparate emporcáu con escupiatos.

Dende l’asociación declararon que “Estos grupos d’estrema drecha vense güei afalaos y favorecíos por unes polítiques violentes y autoritaries pa resolver problemes políticos.” Y destacaron la importancia de permanecer  “xuni@s más que nunca en pro de les nueses idegues de xusticia, llibertá y democracia.”

La Manzorga ye un espaciu autoxestionáu y ensin ánimu d’arriquecimientu que surdió en Xixón el branu de 2.013 como un llugar d’alcuentru pa la dinamización sociu-cultural. Dende entós entamáronse ellí numberoses charres, presentaciones de llibros, alderiques, proyecciones de películes y otres actividaes de calter cultural y revindicativu que, al paecer, fadien a un determináu sector de la sociedá.

Nun ye la primer vegada que fechos asemeyaos asoceden en Xixón, qu’esti branu sufrió una serie d’actos de calter violentu y contra símbolos democráticos, como pintaes y estroces delles -la postrera nel C.P. Xovellanos-  ensin que s’investigara l’autoría de los mesmos.

Redaición InfoAsturies

This work is licensed under a Creative Commons Attribution 4.0 International License.