Güei tarán a les 13:30 nel Parque Teunolóxicu de Cagüeñes y acudirán después a la concentración contra los Premios Principiegos na Plaza la Escandalera
Dende l’Asamblea de Trabayaores de Duro Felguera, que ta costituyía pola mayoría de los comités d’empresa y trabayadores, al marxe de sigles sindicales,culpen al actual presidente, Angel Antonio del Valle y al conseyu d’alministración de la situación na que s’alcuentra la empresa, que llegó a anunciar que “nun podría facer frente a los pagos del mes de Payares”. Nel so comunicáu a la ciudadanía, l’asamblea afirma “Creemos firmemente na viabilidá de la empresa y na profesionalidá de los nuesos compañeros, pero vemos con esmolición el futuru”. Esta esmolición vióse agravada al romper el presidente la so palabra y presllar la filial de Duro Felguera en Llanera, Tedesa, dexando na cai a 40 emplegaos , ensin que se yos ufriera siquiera la so recolocación n’otres filiales.
Lo que desixen coles sos movilizaciones, que ya entamaren el 28 de setiembre, ye un plan industrial seriu que nun contemple l’amenorgamientu de plantiya. Amás de les dos concentraciones de mañana tienen convocáu un manifestamientu el 25 d’Ochobre a les siete la tardi en Xixón (Plaza l’Humedal).
Llucía F. Marqués
This work is licensed under a Creative Commons Attribution 4.0 International License.
