La IXP Faba d’Asturies preve qu’esta va ser una gran collecha, gracies a les condiciones climátiques

El Conseyu Regulador d’IXP de la Faba Asturiana con sede’n Grau, calcula que se pañaran  alredor de 200 tonelaes de fabes en toa Asturies, una collecha escelente, qu’en casu de cumplir les mires va superar en siete tonelaes a la del añu anterior y que va ser posible gracies a les lluvies d’esti branu y el sol del entamu de seronda.

Esta temporada semáronse en toa Asturies 165 hectárees de faba acoyida a la IXP, frente a les 134 que se semaren nel 2.016. Na actualidá contabilícense 141 productores de faba asturiana certificada, pasando de ser un cultivu complementariu a cobrar un gran protagonismu, dada la so gran demanda –gran parte de fora d’ Asturies- que fai quedar escases mesmo les bones colleches.

El xorrecimientu del terrén semáu, la profesionalización del cultivu y l’incorporación al mesmu de llabradores mozos nel casu de la faba, al igual qu’asocede cola mazana de sidre, demuestren la importancia de les marques de calidá que certifiquen l’orixe de los productos del país a la de fomentar l’agricultura rentable y caltenible.

Llucía F. Marqués

This work is licensed under a Creative Commons Attribution 4.0 International License.