El PP esixía esaniciar del testu cualisquier alusión a la simboloxía nazi de los agresores

Esta selmana nel madrilanu Congresu de los Diputaos el Partíu Popular vetó una declaración institucional de conderga a les agresiones fascistes na Diada valenciana.

Dende Compromís, el partíu valencianu d’esquierda nacionalista qu’impulsó’l testu, espliquen que lo consensuaron con tolos demás grupos parllamentarios pero que’l Partíu Popular reclamaba sustituyir les referencies a los símbolos nazis de los agresores o al calter fascista d’estos ataques violentos, por una conderga xenérica y astracta a “tou tipu de violencies”, escaeciendo asina’l componente políticu d’estos fechos concretos como yá fizo’l PP valencianu.

Los parllamentarios de Compromís tamién realizaron delles entrugues al Gobiernu español interesándose por dellos aspeutos del dispositivu policial esistente na Diada y por qué los fascistes nun foron desarmaos. Precisamente por mor de la grave pasividá qu’amosaron los policíes, dende Compromís reclamaron la dimisión del delegáu del Gobiernu español en Valencia, Juan Carlos Moragues.

This work is licensed under a Creative Commons Attribution 4.0 International License.