La mesma sablera fuera oxetu apocayá d’una llimpieza de basures por parte de voluntarios de Greenpeace

SEO/BirdLife ye una organización pol caltenimientu de la naturaleza y la biodiversidá fundada en 1954 coles mires de caltener les aves monteses ya’l so hábitat. Ente les actividaes más frecuentes d’esta sociedá ta la visita a distintos llugares d’observación ornitolóxica, los trabayos voluntarios de recuperación d’espacios naturales y la concienciación ecolóxica de los neños.

Tou eso foi lo que fixeron la pasada fin de selmana na gozoniega sablera de Xagó, a la que s’averaron pa descubrir la so redolada, fauna y valores naturales, aprofitando la visita pa esaniciar les plantes alóctones invasores que tán perxudicando la zona, principalmente la uña de gatu, -Carpobrotus acinaciformis-.

Les plantes alóctones invasores son el segundu factor de perda de biodiversidá a nivel mundial y un grave problema n’Asturies, onde l’exemplu más claru ye la xorreciente invasión de plumeros de la Pampa.

Redaición InfoAsturies

This work is licensed under a Creative Commons Attribution 4.0 International License.