Foi realizada nel recintu ferial Santa Teresa

El conceyu de Tinéu cellebró per primer vegada un concursu avícola, acompañáu de la correspondiente y típica esposición, que foi entamáu pola Asociación pa la Recuperación de la Pita Pinta Asturiana nel recintu ferial de Santa Teresa de Tinéu. Esti espaciu foi compartíu cola feria de bovín y equín de San Francisco. Tuvieron espuestes unes 126 pites, la mayoría de raza autóctona.

Pa Emilio Martínez, miembru de la entidá organizadora, esti certame “ye una manera d’espardir la raza y de sumar criadores a l’asociación”. Tamién recuerda que l’autóctona pita pinta ta en peligru d’estinción y que en 2002 casi desaparez. Esta variedá destaca amás pola so calidá cárnica, asina como por una producción de güevos con media añal de 220. “Anque la ponedora produz más, la calidá del güevu nun ye la mesma y los criadores de pita pinta la tienen en llibertá y eso nótase”, asegura Martínez.

This work is licensed under a Creative Commons Attribution 4.0 International License.