La decisión foi adoptada tres una consulta pública, na que participaron 60.000 ciudadanos

El Gobiernu escocés allóñase nuevamente del Gobiernu británicu anunciando la prohibición del fracking. Un añu dempués de que Theresa May impulsara la estracción de gas natural y petróleu al traviés de les polémiques técniques de “rotura hidráulica” nel 64% del territoriu del Reinu Uníu, Paul Wheelhouse, ministru d’Enerxía d’Escocia, afirmó nel parllamentu escocés que la moratoria va durar “indefinidamente” nel so país.

La midida foi decidida dempués d’una consulta pública, reclamada pola sociedá civil, na que’l 99% de los 60.000 escoceses que participaron refugaron el fracking poles sos consecuencies nel entorniu ambiental y na salú pública, ensin escaecer los escasos beneficios económicos que realmente xenera.

El Partíu Conservador yá manifestó’l so desalcuerdu, considerando que va implicar la ralentización de la economía escocesa, mientres que’l Partíu Llaborista y el Partíu Verde proponen al Gobiernu autónomu del Partíu Nacionalista Escocés el convertir la moratoria indefinida nuna prohibición completa.

This work is licensed under a Creative Commons Attribution 4.0 International License.