Pente muncha rocea por mor de la trayeutoria antiasturiana del PSOE  y a l’ambigüedá d’un testu que nun afita nin feches nin fechos, la sociedá asturiana amuésase positiva ante l’aprebación por mayoría absoluta (82%) de la “enmienda pola oficialidá del asturianu”

Pa l’Academia la Llingua Asturiana la decisión de la FSA-PSOE d’amestar a les sos llinies programátiques la demanda de la oficialidá de la llingua hestórica del pueblu asturianu –seique llegue con retrasu, “años dempués de qu’otros partíos asturianos parllamentarios l’amestaren al so ideariu políticu” – fai posible enanchar el consensu políticu pa facer vidable una reforma del Estatutu que lleve a la tan naguada oficialidá.

Dende l’ALLA aprofitaron pa remembrar que “La demanda de la oficialidá foi y sigue siendo la esixencia permanente d’una parte mui importante de la sociedá y de les instituciones asturianes, práuticamente dende la transición política.”, polo que’l PSOE nun fai sinón dar un pasu nel sen que-y pidi la sociedá asturiana.

Nes sos declaraciones, Lola Suárez –Dellegada de Llingua y Cultura d’Andecha Astur–  felicita al pueblu asturianu por consiguir que’l PSOE se vea forciáu a camudar la so postura no que cinca a la nuesa llingua  “El decidíu apueste de la población asturiana pola so llingua ya’l  trabayu ensin descansu de les organizaciones que, como Andecha Astur, llucharon siempres por ella, llevó al partíu socialista a replantegase la so oposición frontal a la llingua y a incluyir, por pidición d’un ampliu seutor de los sos afiliaos, una enmienda llixeramente favoratible a la oficialidá, polo que nun podemos sinón felicitalos, y felicitamos”. Sicasí, amuésase desconfiada de la repercusión real d’esta enmienda, a la que tacha de “poco contundente y concreta” nel algame la oficialidá, remarcando de pasu la inclusión nel testu de la enmienda del “inventu del gallegu asturianu, col qu’esti partíu quier francer la unidá llingüística.”

Inaciu Galán, d’Iniciativa pol asturianu, considera qu’esta ye una fecha hestórica y confía en qu’esti  “consensu ca  vegada más ampliu” lleve a costruir un futuru pa la llingua asturiana.

La reación  d’IX y Podemos  ante esta enmienda foi la d’afalar al PSOE a  “dar ya pasos reales hacia la oficialidá del asturianu”, daqué que nesti intre ta dafechu nes sos manes, ya que la oficialidá podría ser declarada darréu p’alrodiu’l 90% de la población –correspondiente a los conceyos gobernaos por estos tres partíos-  ensin falta d’esperar pol estatutu.

Llucía F. Marqués

This work is licensed under a Creative Commons Attribution 4.0 International License.