Abiertu’l plazu para presentar orixinales a la ventisiete edición del premiu asturianu de poesía de mayor prestixu

El Conceyu de Mieres convocó’l Premiu de Poesía n’Asturianu Teodoro Cuesta, qu’anguañu llega a la so XXVII edición, afitándose como’l de mayor importancia n’ Asturies.

El Serviciu de Normalización Llingüística de la Casa de Cultura de Mieres ye quien abre la convocatoria d’esti galardón, que cunta con una dotación económica de 4.000 euros, contemplándose promover  la so espublización.

Al premiu pueden optar toles persones que presenten un poemariu inéditu, orixinal y escritu n’asturianu. Los orixinales acompangaos de cuatro copies- tendrán d’apurrise en man o per corréu certificáu a la Casa de Cultura “Teodoro Cuesta” (secretaría). Manuel Llaneza 8, 33600 Mieres del Camín ente los díes 1 y 31 del mes d’ochobre.

El fallu del xuráu, que podría declarar el premiu ermu, va dase a conocer nel plazu d’un mes ya’l premiu va entregase nun actu públicu en fecha entá ensin determinar. Amás, l’autor comprométese col Conceyu de Mieres a participar nos ‘Alcuentros col autor’ col Club de Llectura del Atenéu de Turón y a presentar el so poemariu na Casa de la Cultura.

Na última edición premióse’l poemariu Carenda, d’Ana Medina Zarabozo. Dientro de los premiaos figuren Marisa López Diz, Elías Veiga, Berta Piñán, Xuan Bellu, Vanesa Gutiérrez, Antón García, Esther Prieto, Xuan Santori, Ánxel Álvarez Llanu, Pablo Texón , Pablo Rodríguez, Marta Mori y Ánxel Nava.

Redaición InfoAsturies

This work is licensed under a Creative Commons Attribution 4.0 International License.