Conceyu contra la Incineración convida a los asturianos a un conceyu abiertu p’aldericar alrodiu’l nuevu Plan de Residuos
Vien d’abrise’l trámite d’información pública del Plan de Residuos, dexando un plazu pa les posibles allegaciones ciudadanes al mesmu. Nesti plan, denuncien dende’l Conceyu contra la Incineración, caltiénse la quema de residuos como parte de la so xestión.
Tres de la gayola producía pol frenu de la proyeutada amburadora, una segunda llectura dexa ver que la quema siguirá faciéndose, pero nes istalaciones de la cementera de Carreño y la térmica de Mieres, lo que ye esautamente igual de contaminante pero, eso sí, más barato.
Esta midía, alerten dende’l Conceyu, nun fai sinón asegurar l’espoxigue de la contaminación na perdañada fastera central asturiana.
Poro, convoquen a toa triba d’asociaciones ciudadanes y persones interesaes, vecinos, sindicatos, partíos y persones afeutaes d’una u otra mena pola contaminación y en xeneral cualesquier persona dispuesta a alegar contra esti plan de residuos a aconceyar esti miércoles 4 d’ochobre a les siete de la tardi na Casa Cultura de Candás, pa falar de les consecuencies a mediu y llargu plazu d’esti Plan y apautase pa facer les correspondientes allegaciones dientro’l plazu.
Llucía F. Marqués
This work is licensed under a Creative Commons Attribution 4.0 International License.
