Cientos de families cellebraron nel Muséu del Pueblu d’Asturies el quintu Díe la Reciella y la Carrera Entaina pol asturianu
La salida de la maratoniana xornada dióla a les once la carrera de families pol asturianu, Entaina, na que grandes y piqueños se rieron tantu como corrieron, dando vueltes alrodiu’l llagu del Muséu del Pueblu d’Asturies mientres se facía entrega simbólica del testigu de la llingua pente los miembros más vieyos y los más nuevos de la mesma familia.
De magar entos les actividades familiares socediéronse ensin pausa: talleres de yoga, manualidaes, alfarería, skate, periodismu y güerta urbana; espacios de xuegu llibre y debuxu, zona de llectura, partíos de rugby y fútbol retrasmitios n’asturianu, l’actuación del xovencísimu monologuista Colasín y música abondo, tou ello n’asturianu, amosando una vegada más lo cenciello que ye usar la nuesa llingua como vehicular en cualisquier materia.
La folixa finó bien pasaes les siete de la tarde, con danza prima comunitaria y unos cuantos bailles a lo suelto a los que s’animaron dellos espontaneos.
Esta xornada lleva’l nome de la asociación que la organiza, Reciella families pol asturianu, que tien el so enfotu n’esparder y caltener la nuesa llingua nes xeneraciones futures.
Llucía F. Marqués
This work is licensed under a Creative Commons Attribution 4.0 International License.
