El VII SISGA, una de les cumes más importantes de la sidre de copa a nivel mundial, desendolcaráse en Xixón del  vienres 29 setiembre al domingu 1 d’ochobre, con concursos, tasties, alcuentros y alderiques alrodiu de la sidre de copa

La meyor sidre de cuatro continentes tien esti fin de selmana en Xixón la so cita añal nun Salón con prestoses novedaes. El vienres pela mañana llevaráse a cabu un concursu nel que un xuráu internacional decidirá los Premios SISGA 17 a les meyores sidres de cauna de les categoríes, premios que s’entregarán na Cena Gala d’esa mesma nueche, a la qu’acudirán llagareros d’estremaos países y persones venceyaes al mundiu de la sidre.

El sábado tendrá llugar la Tastia Abierta al públicu na Colexata San Xuan Bautista, de  12:00 a 21:00 hores. Nella podrá degustase sidre de más de 15 países , una ocasión esceicional pa tastiar sidres de llugares tan estremaos como Estaos Xuníos,  Xapón, Portugal, Alemaña, Sudáfrica o la República Checa, cola oportunidá amás de falar colos sos productores. Habrá sidres esplumoses –brut, dulces, semiseques y rosaes- sidres de xelu, auguardientes, sidres ellaboraes con ingredientes orixinales, aperitivos y compuestes de sidres y les que se presenten en formatos d’un terciu, toes a disposición del públicu  por namás 5 €.

El domingu 1 d’ochobre trae novedaes nel SISGA: amás de l’avezada  xornada orientada a sumilleres profesionales tendrá llugar el I Alcuentru de Periodistes y Bloggers de la sidre, onde los profesionales de la comunicación que dediquen el so tiempu a esta bébora celebrarán una mesa reonda.

El Salón Internacional de les Sidres de Gala ye un eventu entamáu pola Fundación Asturies XXI, organización ensin ánimu de llucru enfotada nel caltenimientu, espardimientu ya espoxigue de la cultura asturiana en toles sos vertientes.

Llucía F. Marqués

This work is licensed under a Creative Commons Attribution 4.0 International License.