El conceyu de Xixón llanza una nueva campaña “normalizadora” ensin tresfondu real ya ensin poner en marcha denguna midía efeutiva pa asegurar los drechos de los asturfalantes
La nueva campaña normalizadora de la llingua del conceyu Xixón dientro del Plan de Normalización Llingüística aprebáu pal 2016/2019 “col enfotu de fomentar la normalización, l’usu y la presencia de la llingua asturiana en tolos ámbitos de la vida cultural y social del Conceyu de Xixón” consiste nel repartu de 25.000 folletos, iguales que los que se repartieron na anterior campaña, en 600 establecimientos comerciales. Ello ye, los comercios apuntaos podrán apurrir a los sos veceros trípticos col pallabreru correspondiente al so negociu y pegadielles cola frase “Préstame que te preste”. Siempres que’l negociu en cuestión venda productos de primer necesidá, ya que los trípticos tienen cinco categorías: Pexe, Fruta y verdures, Carne y embutíos, Pan, lleche y derivaos, y Ropa.
Una iniciativa que podría ser un prestosu complementu a la única normalización vraera, que sedría la oficialización de la llingua nel conceyu y la implantación de midies que aseguraren l’usu del asturianu como llingua vehicular de les comunicaciones pente los ciudadanos y la alministración del conceyu.
Especialmente valoratible ye la participación de la Unión de Comerciantes nesta campaña, dao la importancia de la implicación d’esti seutor na normalización efeutiva de la nuesa llingua.
Redaicion InfoAsturies
This work is licensed under a Creative Commons Attribution 4.0 International License.
