La segunda convocatoria de puestos interinos suma casi mil places, que nun se convocaron primeramente, esto ye, casi mil profesores que faltaron nos colexos nel entamu de cursu

El sindicatu d’enseñantes SUATEA denuncia a la política de “retención” de places docentes fasta la segunda convocatoria como responsable de les series dificultaes nos centros al entamu del cursu, dándose  abondos casos nos que les places ensin cubrir nun mesmu colexu superaben los cinco docentes, llegando a faltar fasta catorce profesores nun solu centru. Esto queda claramente espeyao nes 924 places que vienen de salir -396 vacantes- demostrando qu’al entamu de cursu faltaba-y enforma pa desendolcase con “absoluta normalidá” como plantegaba’l Sr. Genaro Alonso. Tal como se denunciara dende centros y sindicatos, la primer convocatoria yera claramente insuficiente para atender les necesidaes de los colexos ya institutos asturianos.

Esta política de retención de places repetise añu tres d’añu. Al  nun sacar toles places vacantes na primer axudicación perxudicase a tolos sectores educativos: de primeres, ta nidio qu’a los escolinos, pero tamién al profesoráu fixu, que tien d’asumir les correspondientes guardies, viendo amontada la so carga lleutiva, y a los mesmos interinos, na midida na que d’esta segunda axudicación puede sacase la conclusión de la esistencia d’un númberu de vacantes de podríen otorgase na primera. Nun faelo asina significa que munchos docentes que, por tar los primeros na llista, yá solicitaron plaza na primer convocatoria y nun pudieron optar a un númberu importante de puestos que podríen ser del so interés, a les que sicasí sí van optar aquellos que tán más atrás nes llistes.

Resulta alarmante la medría del profesoráu interín frente al fixu, colo qu’ello acarreta d’inestabilidá tantu para los centros como pa los trabayadores, pero entá ye más esmoleceor l’aumentu de personal contratáu a media xornada, colo qu’eso supón tantu para les condiciones llaborales del profesoráu como para’l desendolcu de la so actividá educativa nos centros.

Llucía F. Marqués

This work is licensed under a Creative Commons Attribution 4.0 International License.