Nun comunicáu de la ministra d’Asuntos Esteriores, compartíu pola primer ministra

Fiona Hyslop, ministra d’Asuntos Esteriores d’Escocia, del Partíu Nacionalista Escocés (SNP), emitió un comunicáu sobro la situación política de la nación de Cataluña y del Reinu d’España nel qu’afirmaba que “tolos pueblos tienen el drechu al autodetermín” y a decidir la forma de gobiernu que más convenga a les sos necesidaes. La primer ministra escocesa, Nicola Sturgeon, pela so parte compartió’l comunicáu dende la so cuenta de Twitter señalando que “el drechu al autodetermín ta reconocíu polos trataos fundacionales de la Organización de les Naciones Xuníes (ONX)”.

“Ye esencial que la democracia y los drechos civiles se respeten en tolos países” manifestaba Hyslop. Amás recordaba precisamente como exemplu los alcuerdos de Edimburgo n’ochobre del 2012, ente los gobiernos d’Escocia y del Reinu Xuníu, que determinaben les condiciones pa cellebrar un referéndum d’autodetermín, col compromisu de que los resultaos seríen respetaos per dambes partes.

“Dos gobiernos, con visiones diametralmente opuestes sobro si Escocia tenía que ser independiente, fueron capaces d’alcordar un procesu que permitiría decidir a la xente”, siguía Hyslop.

This work is licensed under a Creative Commons Attribution 4.0 International License.