L’autorización ambiental de la planta de purinos que la Central Llechera ta construyendo en Navia -al par de la papelera- al traviés de la sociedá Biogastur foi reformada ensin previa fase de publicidá y consulta, de manera que permite’l tratamientu dientro de la mesma de restos non ganaeros
Antes mesmo del entamu del furrulamientu de la planta de tratamientu y depuración de purinos de vacunu y aprovechamientu enerxéticu del biogás xeneráu, el Principáu amplió’l rangu de les borrafes a tratar na planta. El proyeutu orixinal aprobáu y que salió a información pública’l 14 de xunetu del 2015, yá xenerara rocea y numberosos allegamientos anantes d’esta reforma.
Los residuos qu’anguaño van poder tratar inclúin folles d’industries lláctees, llacto sueru, restos retiraos de cadenes alimentaries de productos llácteos, folles procedentes del tratamientu biolóxicu d’agües residuales industriales, forgaxa de corteza y madera, folles de tratamientu d’agües residuales urbanes, gallinaza y magalla, un total que s’avera a les 120.000 tonelaes de restos variaos, amás de les 1.060 tonelaes diaries de purinos y 120 tonelaes diaries de biomasa vexetal.
Los problemes rellacionaos con golores y arramaos tán aseguraos cola xestión de toos estes borrafes orgániques, daqué qu’asocede amás nuna zona yá bien castigada nesti sen, como Navía que lleva décades careciendo la contaminación de la papelera.
Nun ye la primer vegada que dende’l “Principado” se modifica de forma unillateral una autorización ambiental ensin informar a los vecinos nin al restu d’entidaes esmolecíes pol impactu ambiental, pa evitar asina la presentación d’allegamientos.
Redaición InfoAsturies
This work is licensed under a Creative Commons Attribution 4.0 International License.
