Soliciten  “al Principado” qu’esixa a la papelera Ence midíes para evitar les filtraciones de llixiviaos del parque de maeres

Según denuncien los ecoloxistes el parque de maera de la papelera atopase a malpenes 30 metros de la ría, ensin cuntar cola necesaria impermeabilización qu’evitara’l peneráu de llixiviaos procedentes del almacenamientu de maeres.

A los fluyíos xeneraos pola madera –de testura aceitosa y color  chocolate, con gran carga d’aceites y partícules ya importante golor- añádense les borrafes de procesos (nuedos de madera con llexíes y químicos) que suelen tresvertir del almacén y aporten a esa zona, aumentando’l problema.

La balsa xenerada per estes agües contaminaes presenta un fuerte golor y color  negru, siendo presumible la filtración del so conteníu a la cercana ría, onde se repararon manches d’aceite y capes flotantes.

Tres dellos años nesta situación la balsa de contención ta a la llende, polo que los ecoloxistes tarrecen que l’agua pueda faela degolar, colo que se produciría un arramáu direutu.

Llucía F. Marqués

This work is licensed under a Creative Commons Attribution 4.0 International License.