El cambeu climáticu afeuta ya a la ganadería asturiana: la escasez de pación que produxo la seca d’esti añu nes montañes de Babia adelanta la marcha del ganao más d’un mes respeuto a lo que yera avezao
Los rebaños de Torrestío pasen el branu nes montañes de Babia, na llende colos conceyos de Teberga y Somiéu. Lo avezao ye que suban en mayu pal so pastoreo estival y nun baxen fasta entamos d’ochobre, pero esti añu los tres rebaños que pacen nes brañes de Torrestío, caún con unes 1.600 cabeces de ganao, ya dexaron el puertu y ficieron el so “Descensu a Les Marines”, forciaos pola falta d’alimentu nes brañes de Valverde, Solarco y Trespando
Nel so camín pasen tolos años peles llocalidaes de Torrestío, Quirós, Proaza, Santu Adrianu , Trubia y Les Regueres, aportando dalgunos en segundu tramu dica Llanera, Corvera y Gozón, una tradición trasumante que permite a los ganaeros aprofitar los praos d’alta montaña, dexando los del llano pal iviernu, qu’esti añu promete ser llargu y secu, lo qu’implicará más gastu en yerba p’aquellos a los que nun algame la pación segao pa tola estación fría.
Llucía F. Marqués
This work is licensed under a Creative Commons Attribution 4.0 International License.
