Protesten pol usu del asturianu esixendo que tamién tendría d’emplegar el castellán y l’inglés

El partíu lliberal español Ciudadanos nuevamente amuesa la so obsesión con imponer la llingua castellana en tou tipu de contestos sociales y de llugares xeográficos. Asina’l so grupu municipal nel Conceyu de Xixón protesta porque’l cartelu del programa d’actividaes de la Fiesta de la Sidra Natural tea escritu n’asturianu ensin cuntar con versiones traducíes al castellán y a la veríes.

Sicasí, cuando les instituciones públiques que funcionen colos impuestos de tola ciudadanía asturiana, entamen eventos o desendolquen actividaes nes que les úniques llingües emplegaes son el castellán y l’inglés, esti partíu políticu nun manifestó nengún interés pola llingua propia del pueblu asturianu.

Ciudadanos xustifica la so actuación como atención a los turistes que visiten la ciudá mientres el branu, cómo si esta actividá sidrera tuviera centrada na atracción d’un supuestu turismu internacional masivu. Igual esi ye l’horizonte al qu’aspira Ciudadanos pa iguar los importantes problemes económicos de la sociedá asturiana: una sociedá de servicios dependiente del esterior.

This work is licensed under a Creative Commons Attribution 4.0 International License.