El Descensu del Nalón batió records de públicu y de participación, con 54 embarcaciones y cerca de 5.000 persones desfilando, de la Pola a Puente d’Arcu y vuelta pel ríu a La Chalana, pa cellebrar el 50 Cabudañu del Descensu
Esti añu’l xuráu túvolo más que difícil pa decidir quien llevaba la naguada “Sopera”. L’avión cargáu d’animales de Madagascar, Tintín a elefante, una serena con guitarra, cuélebres, la imprescindible ballena del Nalón, un barcu de papel empapeláu con noticies y cartelos del descensu, una cuadra, un circu y asina fasta 54. A naide se-y escaeció llevar la bandera d’Asturies, como manda la tradición, y canciar al altu la lleva’l Chalaneru, de la que se pasa pela Chalana.
La Soperona foi pa la Peña Barettini, que baxo pel ríu con Cesar entá mangáu nel Coliseo ensin siquiera
despeinase, llevando a la peña fasta’l Chalanín pola so quinta sopera, como vaticinaba’l nome de la carroza: “Ave Barettini, los que van a pol Chalanín te saludan”.
Harry Potter montáu n’hipogrifu ya’l Hogwarts Express algamaron el segundu premiu, baxando pel ríu como por arte de maxa, ya’l terceru quedó pa Xuegu de Tronos. Otros de perbona calidá, como Madagascar Airlines o Tintín tendrán qu’esperar a otru añu, esti taba mui difícil.
Ye de destacar l’ameyoramientu de la calidá, recuperáu pol llabor de l’ Asociación d’Amigos del Descensu Folklóricu del Nalón, un ensame de xente qu’ante’l declive que paeció menaciar el festexu durante unos años decidió ponese manes a la obra pa que nun decayera esta folixa. Pueden decir con arguyu que lo consiguieron y ye gracies a ellos que pudo esfrutase d’un 50 Descensu col prestosu ambiente y la calidá que tuvo esti añu.
Llucía F. Marqués
This work is licensed under a Creative Commons Attribution 4.0 International License.
