Les frecuentes emisiones de nubes prietes y naranxes provenientes de les chimenees d’Arcelor yá malpenes sosprienden a los asturianos, avezaos como tamos a ser víctimes d’esta contaminación, pero la so peligrosidá quedó patente pa un grupu de turistes que dieron l’alerta, unviando les sos semeyes tomaes dende l’autopista

La reforma realizada l’añu pasáu nun consiguió esaniciar los problemes avezaos de les emisiones de partícules con metales na acería, yá que, seique ye ciertu qu’agora les nubes son de menor tamañu, son muncho más frecuentes y a les continues nubes naranxes vienen sumase agora les prietes.

La Coordinadora Ecoloxista d’Asturies fíxose ecu d’esta alarma y volvió denunciar  el fechu énte la Conseyería d’Infraestructures del Principáu “Ensin que fasta’l momentu se tomare midida dalguna p’amenorgales  o embriviles a pesar del so eleváu impactu na redolada y de les nueses denuncies y les de los vecinos que lo carecen”. Pa ellos ta nidio que l’actual procesu d’aspiración, llaváu y depuración de gases de l’acería nun ye l’afayadizu y “ye preciso ameyoralu ensin demoranza pa evitar estes continues emisiones contaminantes que carecen los vecinos de Carreño.”

Los picos de contaminación atmosférica disparen los ingresos hospitalarios n’ Asturies por enfermedaes respiratories, d’alcuerdu a un estudiu epidemiolóxicu realizáu pola conseyería de Sanidá presentáu l’añu 2016. La estación de control de la contaminación que tuvo temporalmente asitiada nel pueblu de Llogrezana presentaba valores bien perriba de la norma, polo que’l “Principado” decidió retirar la estación de midida y allugala n’otros puntos del conceyu menos esclaradores.

Llucía F. Marqués

This work is licensed under a Creative Commons Attribution 4.0 International License.