L’actu tendrá llugar el domingu 20 d’agostu  a les 13.30 en Tarna, delantre’l monumentu que fai alcordanza de la que foi la cabera declaración d’independencia asturiana

El 21 d’agostu de 1937, va xusto ochenta años, los asturianos independizábense a tolos efeutos de la República Española, proclamando’l Conseyu Soberanu d’Asturies y Llión, entamando un procesu hestóricu que-y valió  la so reconocencia a nivel internacional y nel que defendió heróicamente’l so territoriu coles armes frente al exércitu franquista español y los sos alliaos alemanes ya italianos, pero que, como recalquen dende A.A., nun cuntó nunca cola aprebación de la República española, “que llegó a considerar un alliviu l’acupación d’Asturies poles tropes facistes.”

Na so convocatoria A.A, tamién quier facer remembrar el fechu de que los asturianos nun pudimos decidir democráticamente la nuesa forma de gobiernu actual “La falsa transición política cola que continuó’l franquismu non solo nun permitió recuperar esta auténtica istitución d’autogobiernu, sinón qu’impunxo –ensin que’l Pueblu Asturianu pudiere votalo- un “Principado” y un Estatutu descontestualizáu hestoricamente y sociolóxicamente ayenu a la sociedá asturiana, condergándomos a la situación de colonialismu que carecemos anguañu.” Polo que consideren el Conseyu Soberanu como la postrer istitución democrática del Pueblu Asturianu y fai un llamamientu a la población asturiana de reclamar la soberanía como “un drechu inrenunciable imprescindible p’afitar el nuesu futuru como Pueblu.”

Nel Puertu Tarna, a la 1 y media del meudía del domingu 20 d’agostu, nel monolitu comemorativu, tendrá llugar el tradicional actu d’ homenaxe a esta Declaración de Soberanía del Conseyu Soberanu  que cada añu celebra Andecha Astur.

Llucía F. Marqués

This work is licensed under a Creative Commons Attribution 4.0 International License.