Les declaraciones de Carlos Zúñiga, empresariu de la plaza d’El Bibio, tachando de “mindundis” a los antitaurinos desamarraron un argayu de sofitos, siendo yá trenta les asociaciones animalistes, plataformes ciudadanes y organizaciones polítiques que se xuntaron a la convocatoria

Coincidiendo colos festexos taurinos de la Feria de Begoña de Xixón ANADEL (Asociación Nacional Animales con Derechos y Llibertá) convoca un añu más, una manifestación contra les corríes de toros que va salir a les 16:30 de la Plazuela San Miguel y va percorrer delles cais de la ciudá fasta aportar a la Plaza del Bibio.

La representante d’Anadel, Elena López  albidra que ye bultable’l  refugu énte’l  maltratu animal n’Asturies, anque tea llegalizáu y declaró a la prensa que cada añu percíbese un “xorrecimientu  importante del númberu d’asistentes que demuestra qu’Asturies ye antitaurina”.

Arturu Bermeyu, secretariu xeneral d’A.A –una de les organizaciones polítiques que sofiten la concentración- llanzó la so acusación al Conceyu de Xixón, yá que dáu l’escasu sofitu popular esta feria non podría celebrase de nun recibir añalmente cuantioses aportaciones  de l’alministración  pública. “El sofitu incondicional del gobiernu llocal a estos festexos, tan ayenos a la cultura asturiana como crueles, amuesen hasta que puntu tán desconectaos del pueblu al que dicen representar” . Dende Xixón si Puede anunciaron que van proponer una consulta ciudadana en redol a la tema’l maltratu animal, anque entá nun concretaron feches.

Como adelantu d’esta manifestación, esta selmana numberoses escultures de Xixón alborecieron con un gorru antitaurín colloráu, nel que podía lleese la palabra “tortura”.

Redaición InfoAsturies

This work is licensed under a Creative Commons Attribution 4.0 International License.