En xunu vendiéronse 77 inmuebles por cada 100.000 habitantes, mui per debaxo de la media estatal de 120

El nuesu país contabilizó en xunu la compraventa de 654 viviendes, lo qu’implica un aumentu del 18,3% al respective del mesmu mes del añu pasáu, frente a la subida media del Estáu español del 19,3%, según los datos publicaos pol Institutu Nacional d’Estadística (INE).

D’eses 654 viviendes, 544 yeren llibres y 110 protexíes. Per otru llau, 516 yeren usaes y 138, nueves.

Por comunidaes autónomes, la compra de cases subió en toes, especialmente en Navarra y La Rioxa, que subieron hasta’l 40,2% y el 40,1%, respectivamente. Per detrás asitiáronse Madrid, col 32,6 %; Murcia, col 32,3 %, y Castiella y Llión, col 25,3 %. Los aumentos más baxos danse n’Aragón (1,2 %), País Vascu (6 %) y Galicia (6,4 %).

This work is licensed under a Creative Commons Attribution 4.0 International License.