El primer concursu de la nuea temporada de Pozaricando cellebraráse a la salida de misa del domingu 28 d’agostu, na Plaza la Ilesia de Barros y tendrá dos categoríes: profesional y amateur
Pozaricos son la xente de Barros (Llangréu) y Pozaricando, el concursu baille tres de la misa que la xente’l pueblu avezaba cellebrar allá pelos años cincuenta, colos donativos de los vecinos como premiu.
Esti añu, cola collaboración de La Banda Gaites Conceyu Llangréu, recupérase esa tradición, camudando un pizcu les bases y la so periodicidá, nel I Concursu de baille “Pozaricando”. Podrá participase nelli en dos categoríes estremaes, la profesional pa pareyes que yá participen n’otros concursos de baille, que tienen de plazu fasta’l 25 d’agostu p’apuntase, y la d’aficionaos, pa la xente’l pueblu y del públicu que-y pete baillar que s’apuntaran direutamente a la salida de la misa.
Pa nun ser descalificaos, los baillaores tendrán qu’aguantar tres pieces siguíes: lo pesao, lo llixero y la muñeira, alrodiu de quince menutos a bon ritmu ya ensin parar, baxo l’atenta mirada del xuráu, que tará compuestu por dos miembros cualificaos ya un xuráu popular.
Los ganadores, amás de los 200€, les castañueles, el troféu ya’l diploma que recibirán, tendrán l’honor d’abrir la danza, que se fadra n’acabando’l concursu.
Llucía F. Marqués
This work is licensed under a Creative Commons Attribution 4.0 International License.
