Esti premiu ye un reconocimiento añal a les meyores obres espublizaes demientres l’añu anterior al de la convocatoria

L’Asociación d’Escritores d’Asturies convoca la decimosétima edición de los sos Premios de la Crítica d’Asturies, nos que se escoyerán les meyores obres espublizaes a lo llargo l’añu 2.016 nes cuatro categories que componen los Premios: narrativa n’asturianu, narrativa n’español, poesía n’asturianu y poesía n’español.

Na anterior edición, correspondiente a les obres espublizaes nel 2.015, los autores premiaos na llingua’l país foron Vicente García Oliva cola so novela ‘La vida de siempre’, na estaya de narrativa, ya en poesía Xuan Xosé Sánchez Vicente con ‘De les hores y les memories’.

La presentación de candidatures caltendráse abierta dica’l 29 de setiembre y podrá ser fecha por cualisquier persona, física o xurídica, que quiera poner de relevancia’l valir d’una determinada obra lliteraria. Pa ello, deben apurrir la información na sede de l’’Asociación d’Escritores d’Asturies, nes señes: Hotel d’Asociaciones Santuyano, cai Fernández Ladreda 48, 33011 d’Uviéu.

Tamién tan abiertos los plazos pa presentase a los XII Premios de les Lletres y al Premiu a la Meyor Columna Periodística.

Redaición InfoAsturies

This work is licensed under a Creative Commons Attribution 4.0 International License.