Proponen agrupar les cuadres nun polígonu ganaeru de cuatro hectarees nos alrodios de la depuradora pa costruir nel so llugar aparcamientos y esplanaes pa eventos
El documentu de prioridaes del nuevu Plan Xeneral d’Ordenación (PXO) de Cabrales fai una propuesta sosprendente y que, casu de ser aceutada, camudaría fonderamente la cadarma, la fisonomía y la forma de vida de los pueblos a los qu’afeuta. Agrupar les cabañes ganaeres nuna mesma fastera, nel esterior de los núcleos urbanos, col envís de favorecer la so llimpieza y lliberar suelu urbanu.
La intención, despliquen los espertos, ye «obtener suelu urbanu públicu en núcleos consolidaos pa equipamientos como esplanaes pa eventos esportivos y culturales y concentraciones tipu ferias, además d’aparcamientos, pente otros.” La midía centraríase n’Arenes, pero tamién afeutaría a Poo, Tielve y Carreña.
Anguañu la población d’Arenes ronda los 780 moraores, pero recibe añalmente dellos miles de turistes, polo que paez que les istalaciones previstes tan encamentaes al esfrute de los visitantes y el sofitu al sector turísticu, perriba de la que ye otra de les cimeres fontes d’ingresos de la fastera –xunto coles queseríes, actividá direutamente lligada a la ganadería.-
Presumiblemente’l PXO contempla valtiar les cuadres, non reformales, polo que supondría una importante perdida no qu’a arquitectura tradicional se refier –delles son edificios enforma antiguos- y camudaría bultablemente la fisonomía de los pueblos, daqué que per otru llau puede perxudicar al mesmu turismu, que busca alcontrar nestes poblaciones aquello que les fai estremaes, más que pistes esportives.
Llucía F. Marqués
This work is licensed under a Creative Commons Attribution 4.0 International License.
